妹記大排檔 (已結業)

素聞妹記嘅大名，今日專程黎試試。裝修將街邊大排檔嘅元素帶入室內。餐牌上選擇非常多，好想試勻咁多款菜，本來想叫一份招牌炸豬手，可惜已經賣曬，只得番原隻炸豬手。最後叫左蒜蓉粉絲蒸勝瓜，炸大腸，同鬼馬油炸鬼，全部都系店舖推介。個炸大腸第一口咬落去充滿驚喜，外脆內軟，有少少油爆出黎，但配上酸酸地嘅喼汁又唔會好膩。美中不足只系有幾舊切得比較大，要咬耐啲先碎。鬼馬油炸鬼系大大舊魚肉裹粉炸出嚟。又系外脆內軟，魚肉打到超有彈性，正！勝瓜好新鮮，蒜蓉同粉絲系絕配，好難失手，只系其他兩樣菜特別好食。本身想叫個炒飯，不過見到隔離枱個碟睇落非常大碟，兩個人一定食唔曬。如果想一次過試多幾樣菜，一大班人黎食比較好。店面非常大，每張枱都好闊落，人多都會坐得舒服。