博多拉麵別天神 (已結業)

之前有個朋友成日同我講，博多拉麵別天神嘅拉麵好好食。今次嚟到灣仔掃街，朋友又咁啱想食拉麵，一於襯呢個機會黎試吓。拉麵小店，座位唔多，但都幾闊落，唔會太迫。一坐低，望下menu拉麵有兩款，分別係豚骨湯面同埋蝦味增拉麵。朋友都喜歡豚骨湯底，所以叫咗兩個豚骨拉麵套餐。套餐包括一碗拉麵，一隻溏心蛋同埋小食一款。小食二選一，可以揀小龍蝦蟹子沙律或者餃子四隻因為我哋兩個人，所以每樣要一款，咁就兩樣都有得試啦。小龍蝦蟹子沙律細細碟，旁邊仲有四，五塊紫菜俾你包住沙律嚟食。沙律入邊真係有小龍蝦肉架，份量都幾多添！正呀！可以encore咁套餐嘅餃子有四隻，如果單點呢就35蚊有六隻。餃子味道正正常常， 我較喜歡小龍蝦蟹子沙律。講返碗拉麵， 豚骨湯底香濃，拉麵軟硬度適中。重點係隻溏心蛋，真係好好味！望到溏心係情半流心狀態架！留意番，叫套餐嘅拉麵先會包括埋溏心蛋架， 如果單點一碗拉麵嘅話就要加＄10，先會有溏心蛋一隻。呢度嘅拉麵果然不錯，名不虛傳喎！下次可以再嚟，試埋蝦味增湯底味拉麵。