雲來軒 (已結業)

都有去過棉登徑，但是未試過行到盡頭，發現了有間中菜館，名廚主理，於是乎約朋友一齊去食。樓上店要行一層樓梯，但上到去面積都幾大，好旺好多人，見到咁，應該有質素。兩個人點左三樣嘢，様様菜都用好大個碟，而每個碟都有個性。柚子脆蝦球大碟中間有小碟，用來放汁，橙與柑的味，實際是柚子汁，黏黏地，好味的，蝦又大隻又新鮮。冬陰公炒牛崧生菜包用隻長方型的大碟，一客有六件，呢個好好食，用優質安格斯牛肉做，牛肉鬆軟，味道辣辣地有點刺激，冬陰公汁唔可以睇少，配生菜食正好，減緊啲辣。西湖牛肉羹 用隻扁圓碟，看起來一人份量都咁多，實際都唔少，非常好喎，牛肉靚，好有口感。呢兩款都係新出兼特別推介嘅安格斯牛肉做，有水準。整體服務環境都好，感覺良好。