幸福班戟 (新城市廣場) (已結業)

之前見到係Facebook出post話沙田嘅幸福班戟在疫情影響下唔洗排隊就食到。剛好早幾天約左朋友去沙田新城市買野，就去試一試。當晚8：45分去店舖，離last order尚有15分鐘。餐廳內並未客滿，我們可以直接落完單就坐低等食。由於已食晚餐嘅關係，我們揀左2個人share一份時令鮮果班戟$108,再加兩杯飲品。呢間餐廳係self-service，飲品同食物都要自取。班戟等左15mins就有，見到賣相唔算特別吸引，有啲失望。班戟味道都一樣令人失望。班戟質感同其他專做厚班戟的名店冇乜差別，但啲粉漿真係無味道，蛋香勁淡，班戟要與忌廉一同食先稍為有甜味。生果除了香蕉之外，其他都勁酸。食得出生果只係平價貨，以生果嘅份量同品質計，要加額外$28似乎唔太值得。$108食一個味道一般，賣相唔特別的班戟，抵唔抵真係好個人。幸好是次不需要排隊，如果要排就要計埋時間成本。兩杯飲品冇特別，價格偏貴，我會建議你食完班戟再去其他茶飲店買野飲會開心啲。