海記燒臘飯店

營業中

休息中

尋日食左餐咁貴嘅, 今日師傅決定食餐平! 但係師傅出去食晏時, 一出左門口就有一個疑問, 就係向左走定向右走好呢? 如果向右走, 師傅就好大機會去再興, 但最後師傅決定向左走, 所以就黎左呢度食晏!當師傅黎到呢度時, 即刻喺呢度打左個圈, 最後諗住去清真惠記, 冇錯係去清真惠記, 於是坐底, 但一坐底就出事喇, 原來師傅啱啱坐左喺清真惠記同海記嘅交界, 點知呢張枱原來係屬於海記, 而海記個伙計好快就放左碗例湯喺師傅面前, 咁師傅唯有喺度食一餐啦, 睇左一陣師傅都係決定叫碟肥叉燒飯!肥叉燒飯好快就到, 賣相都唔差, 而叉燒確實幾肥, 做到野喎, 蜜味都幾夠, 但係就唔算好鬆, 煙煙韌韌咁, 有d似豬頸肉嘅感覺, 反而叉燒嘅感覺就唔多似, 不過加少少辣椒醬都幾好味! 而例湯就係送嘅, 都煲得幾夠火喉, 冇味精幾好!總括黎講食物質素都可以, 價錢都叫相宜, 廿三蚊一碗單拼燒味飯, 廿五蚊一碟單拼燒味飯, 加一蚊就可以有雙拼, 仲有例湯送, 都算抵食! 如果早知係食叉燒飯, 師傅就去再興啦, 食燒味始終係再興好d; 不過下次有機會都會再黎, 而笑臉都比得過!