So Bar (已結業)

餐廳嘅環境非常特別，嚟到先知道係同我至愛嘅蘇媽蘇媽同系，入口就係吧，但係內裏仲有蘇媽，蘇吧門口仲有幾張歐多牙嘅枱，可以拎杯酒出嚟呼吸吓，個拱形欄河好有南洋嘅風味。Oolong gin fizz，呢杯烏龍氈酒 cocktail 有三款口味可以選擇，分別係青瓜、西柚同埋橄欖，我哋揀咗西柚味，烏龍茶方面用上咗凍頂烏龍，面頭嘅氣泡帶有清新嘅西柚香氣，伴隨著強烈嘅烏龍茶味餘韻， 氈酒味道濃烈，調酒師一啲都無輕手，酒味、西柚同烏龍嘅味道平衡，係一杯相當出色嘅 cocktail。Seafood platter，海鮮拼盤宜家做緊 promotion 雖然只係賣 299，但係陣容都相當鼎盛，有新鮮海蜆、帶子、鮑魚同埋原隻龍蝦，帶子鮮甜，海蜆仲帶有少量嘅海水味，佢跟機有檸檬同埋 wasabi，我覺得帶子可以就咁食，龍蝦就可以落少少檸檬汁，龍蝦頭嘅蝦膏都唔少，美酒配海鮮，係令人非常滿足嘅一餐。