勝八居酒屋 (已結業)

是日Girl Talk揀了一間好有氣氛的日式居酒屋談天說天同食好東西，勝八居酒屋位於銅鑼灣登龍街，由銅鑼灣地鐵站B出口行過去只須數分鐘。勝八居酒屋店內的設計與日本常見的居酒屋好相似，最吸引的莫過於Bar枱上放滿新鮮的海鮮和魚生，店員推介我們出去看看是日新鮮的魚生再落單，好吸引，真係可以見到邊樣新鮮食邊樣，做到不時不食。經過一輪望聞問切後，我們揀了加拿大海膽、赤貝刺身和帶子刺身。刺身擺盤漂亮，做到日本人的執著。加拿大海膽好大隻，原整一片好吸睛，鮮甜美味，入口即溶。赤貝原隻開出來好大片，立立令，入口爽彈，貝味鮮甜。帶子刺身也是立立令，鮮嫩厚身。刺身高水準，推介。左口魚邊壽司即叫即握，壽司飯力度握得剛好，左口魚邊微微火炙過，入口油脂豐富美味。鐵板牛舌上枱仍是吱吱聲，熱辣辣，本身洋蔥已經好甜，吸收了牛舌味更美味。牛舌好厚身，唔好以為好硬好難咬，原來係外脆內軟，軟諗諗，口感好好，配合埋秘製醬汁，推介。松葉蟹腳天婦羅有幾條好大條兼且原條的蟹腳，有成隻筷子咁長，粉漿透薄，脆而不膩，高水準。拌碟還有厚大的冬菇、賬卜卜的茄子和好甜的南瓜及蕃薯。最後，我們還叫了一杯巨峰提子梳打及水蜜桃梳打一邊食一邊傾。