WeBite Space

營業中

休息中

點解個天又要派我去中上環開會？真係非常討厭喺呢區返工，因為逢食飯時間，大大小小嘅餐廳都會塞滿人，本身同事介紹我，黎呢間舖頭諗住叫過外賣食個飯盒就算，點知黑仔嘅我，原來冇download app，冇預早點餐等於冇得食，我再望望附近嘅餐廳，門口全部都排晒長龍，我決定就咁喺呢度買杯咖啡食個麵包解決。見到收銀附近有特登介紹千層吐司，見佢最大嚿，估計應該係最飽肚，同埋之前喺其他麵包舖聽過，但從來都冇食過，今日就即管試吓囉。入到去有點餐都可以拎食物，唔知以為自己返咗大陸，九成客人都係講普通話，前後唔使10分鐘令得嘢食，天氣太熱諗住求其搵個公園解決午餐，點知熱得滯都係決定坐車返公司慢慢食，可惜未返到公司我杯咖啡已經比我飲咗一半。返到公司見到呢杯已經溶晒冰嘅咖啡，都無損佢嘅味道，依然都好濃郁，值得一讚，可惜見到嗰張飯盒嘅宣傳單張，好似好健康，不過就無緣一試啦。用微波爐叮一叮呢一大嚿千層麵包，未食得出好驚艷，不過都充滿蛋香同埋牛奶味，只能夠講我今日嘅午餐係飽肚的，只係唔夠滿足，可能個天真係要我減減肥囉。