大戶屋 (已結業)

第一次嚟大戶屋食飯叫咗個鯖魚定食，味道貫徹日本嘅家庭料理，味道好清好簡單，唔會食到個口好重味精，不過質素就未令人好驚艷。於是我夾咗友人叫嘅味增豬扒定食試吓，一試不得了，個汁醬煮得好香，於是我決定再嚟多次到我自己嗌呢個定食！平時食炸物最怕浸落啲汁係浸到稔曬，啲炸粉會即刻變到好似粉粒咁好唔雅觀之餘，口感亦都好差，大戶屋嘅味增豬扒完全無呢個問題，炸粉本身夠脆身，而且個汁醬真係好濃郁，索咗入舊豬扒到反而好惹味。豬扒本身啖啖肉，好厚身好鬆軟，上菜時用熱鍋呈上，食到最後一舊豬扒都係熱身。有時出去食呢啲扒餐會飽到個胃好唔舒服，但呢個定食反而會食到好開胃，一碗飯扒乾淨曬，食日本野就係會有種食完身體好乾淨嘅感覺，唔會食到口寡寡，又唔需要飲品佐飯。友人今次叫咗個柚子胡椒雞扒定食，味道一貫咁好，口感好清新，不過我都係推介味增豬扒＞柚子胡椒雞扒＞鯖魚定食！食完主餐後仲叫咗個綠茶雪糕伴蕨餅，四十零蚊一個雪糕有蕨餅有丸子有紅豆仲有穀物係底，完勝所有出面打著日本名物旗號但賣到好貴又唔好味嘅雪糕！*荔枝角店坐得舒服過銅鑼灣分店，座台唔會排到密質質，而且有走動空間，充滿日式家庭料理嘅感覺。