龍皇酒家 (世貿中心) (已結業)

強推爛鬼限聚，令到香港人過新年都無得出街食，唔想呀媽煮得咁辛苦，唯有訂個盤菜返嚟，乾手淨腳。左揀右揀，有啲過年唔開門，有啲連鎖餐店唔想揀，有啲外省款式唔啱我家廣東口味 ....最後無意中見到龍皇廣告，見平時飲茶食飯頑有水準，滿心期待呢個咁好意頭$1680 嘅8人盤菜應該會唔錯！賣相整整齊齊，排位唔差，打咭一流，可惜內裡虛有其表，鮑魚有啲似食擦紙膠，花膠如同咬橡筋，海蔘爽口彈牙，鵝掌骨瘦如柴，醬汁淡而乏味，完全和堂食時嘅鮑汁鵝掌、軟淋花膠判若兩件事，難道過年外賣接得多令質素下降，如果掩眼盲試仲以為係九流飯館菜式，算吧！ 反正味蕾最誠實，食客不再投你下一票就知成績。唉！還要一提贈送的4張禮劵，消費滿$300可使用$50禮劵，如此類推，有效期至31/03/2021，條款本來很合理。弊就弊在只適用星期一至五（晚市），唔得靈活變通呢！而家香港晚晚禁堂食，就算呢一刻話7日後放寬4人飯桌，誰知下一刻幾時頒佈禁止呢！何況香港人大部份平日返工，周末先能夠開心消費，你更改延長有效期，或者周末晚可以用都話啫，而家不如直接不贈送無咁嬲。整盆最好味是冬菇和燒腩肉