正宗上海生煎皇 (已結業)

久聞大名，但一直都未有機會食到。咁啱今日嚟到大埔墟，決定試試佢。中午時間有午餐供應，自選小食主食加飲品，大約$40-$50。一場嚟到當然要試下招牌生煎包，主食叫咗厚切炸排骨菜飯，加多杯凍豆漿。厚切炸排骨菜飯初頭以為炸排骨係一般染有炸漿嘅排骨，但原來呢一種係無用炸漿。呢種炸排骨食落感覺無咁熱氣又無咁乾，可能係厚切嘅關係，排骨保持到好juicy，再加上少少甜味，送飯一流！個飯食到一半生煎包先上，可能因為即叫即煮。生煎包賣相好靚，唔會油淋淋，面頭煎到少少金黃色，再配幾粒黑白芝麻，忍唔住即刻夾起嚟食。一咬落去，d汁即時標出嚟！擺喺旁邊嘅電話都差d遭殃！果然係招牌菜，外皮軟熟中有少少脆口，唔油膩，餡料豐富，肉汁滿瀉！$4x 有呢個質素，好滿意。