亞萊泰 (黃大仙中心北館) (已搬遷) 新店位置

收工經過黃大仙，就喺黃大仙中心搵食。平日夜晚黎到，成個場都冇乜人氣，最後揀咗食亞萊泰，貪佢好多分店，質素應該有啲保證？我哋去到直入，望吓餐牌，見到款式選擇都多。由於下午食咗個tea，唔係好肚餓，所以兩個人只係嗌左兩款食物，冇主食。我哋叫左一份鐵板豬手同埋一份細嘅小食拼盤。上菜速度都好快，豬手望落顏色偏深，醬料應該都落得幾重手。食落去果然冇估錯，味道偏鹹，雖然份量都幾多，肥膏都算少，但都唔敢食太多，驚要瘋狂灌水。而小食拼盤表現正常，有4款唔同嘅食物，每款有兩件，兩個人啱啱好分得勻。不過唔係幾夠熱，影響咗口感。明明早幾年食亞萊泰嘅感覺都幾好，今日再食有少少失望，希望下次可以keep番水準啦！