豪宴海鮮酒家

營業中

休息中

有朋友喺調景嶺新居入伙食晚飯慶祝，附近只有呢間酒樓，上個月先嚟過呢度飲茶，但幾年無喺呢度食過晚飯喇。一行十五人其中三個小朋友，朋友同經理傾好咗每樣份量加少少，價錢亦加少少，足夠十五人份量。個人覺得都可以，菜味道唔會太重，有啲重清清哋添，份量足，雖然唔係服務好好，但人手夠，價錢亦公道。鴻運乳豬件全體，皮都幾脆，有少少偏瘦。上湯焗加拿大龍蝦(伊麵底)，味道唔錯，唔太鹹，但龍蝦無咩肉，伊麵亦唔多。 黑松露帶子蝦仁，大大隻爽脆蝦仁但黑松露味極微，成個菜都幾清淡。瑤柱扒雙翡翠，西蘭花及草菇上佈滿瑤柱絲佈滿芡汁，味道唔太濃。花膠海皇燴生翅，幾好味吖，不過花膠同翅就搵唔到。原隻鮑魚扣金錢，鮑魚炆得唔錯，唔會太淋。清蒸沙巴龍躉，咁大條魚都蒸得幾滑。金牌一品燒雞，個皮唔脆。生炒糯米飯，硬咗少少。雜菌燴伊麵，普普通通。美點畫蟠桃，好大個，餡較少。合時鮮果，佢哋話橙幾甜喎。紅豆沙每人一碗。