十三少 (已結業)

今次嚟咗一間位於西環嘅特色川菜餐廳，可以見到舖頭嘅裝潢非常之富有嘅傳統中國特色，吸引到唔少人光顧。我就試咗呢個幾抵食嘅二人套餐，售價$338 ，有涼菜、小菜、主菜。我揀咗椒麻皮蛋、酸菜魚、麻婆豆腐。椒麻皮蛋賣相晶瑩剔透，同一般見到嘅皮蛋顏色上有少少唔同，呢度嘅皮蛋外觀上更加吸引，似一件精緻嘅藝術品。酸菜魚大大煲，入面有好多口感非常嫩滑嘅魚肉，同埋切成薄片、刀功呈現得非常好嘅酸菜。唔單止味道好，份量亦都好夠食，攞嚟撈飯真係一流。麻婆豆腐嘅醬汁好濃稠，豆腐質地香滑，同樣係非常之適合攞嚟撈飯嘅菜式。