何B車仔麵 (已結業)

土瓜灣真係得好少車仔麵，見到新開左間車仔麵，感到好興奮！舖頭就新裝修，整整齊齊。佢嘅點牌係一張膠嘅卡，跟住有支白板筆可以圈。餸菜嘅選擇我覺得唔多嘅，但係價錢就合理，我揀咗四個餸一個面底，就$50 ，加咗杯凍檸茶就加$8。筷子有兩款, 一款係可洗既, 一款係即用即棄, 有得選擇!個麵一嚟到，個湯底好熱，出緊煙嘅，呢樣真係好重要，我最驚就係飲到啲湯底係唔夠熱。湯底加咗沙嗲汁，味道唔算太濃，將佢攪勻都幾好食，沙嗲有少少甜嘅味道。我見到枱面有辣菜脯，簡直係一個福音，因為我本身好鍾意食菜脯，覺得好開心，不過試少少，睇吓佢唔會太辣。嗌咗韭菜餃， $11有三粒，呢個真係幾抵食; 韭菜餃嘅味道都唔錯，餡料都幾豐富，唔錯！跟住嗌左份生菜啦，量都幾多，有差唔多一舊生菜。跟住又有我最鍾意嘅陳皮魚蛋，因為唔係好多舖頭車仔麵都會有陳皮魚蛋。再嗌左第四個餸就係炸墨魚丸，炸墨魚丸$10三粒，佢個皮都揸得幾好嘅，整體都唔錯。呢間車仔麵整體味道都幾好，量都算夠嘅，粉面底夠多。而佢嘅沙嗲湯底都夠晒清香夠香，再加埋啲辣菜譜，個口感都幾豐富！現場嘅服務員都幾好禮貌，呢一間會再幫襯！