泰上皇 (已結業)

雖然同區亦有其他泰國菜餐廳，當中唔少都有折扣。不過屋企人都幾鍾意食呢間泰上皇。見到Openrice訂座85折，就決定同屋企人嚟到呢間食泰菜。我哋叫咗四樣餸，分別係冬陰公湯、黃咖喱牛腩、馬拉盞炒通菜，同埋牛肉串燒。冬陰公湯味道都算溫和，對於我呢啲完全唔食得辣嘅人來講都唔會有任何負擔，海鮮以魷魚為主，加上少量蝦同埋青口，都算幾足料。黃咖喱牛腩味道甘甜，唔算太辣，有好香椰汁味，屋企人對呢個黃咖喱讚不絕口。馬拉盞炒通菜夠鑊，不過價錢稍貴。牛肉串燒就差少少，牛肉太鞋，醬汁亦唔夠香，有少少失望。順帶一提，雖然呢晚係星期六，我哋6:30入座食到7:30都係得我哋一枱客。係差唔多賣單嗰陣先有另一枱客入座。一唔講嘢嗰陣成間餐廳靜晒都幾尷尬。值得讚嘅係老闆好貼心，聽到我哋話好凍，就即刻幫我地閂細咗個冷氣。