入麵 (已結業)

肉燥糖心蛋麵，配拍黃瓜，白桃綠茶$59 (外賣+$2)首先我自己幾欣賞佢嘅外賣碗，個外賣碗分兩層，上層係擺餸菜，下層就係放湯嘅。呢個設計幾好，因為可以防止d湯倒瀉，二來就可以保持返餸菜原有嘅味道，唔會話浸左係湯好耐，就改變左餸菜自己本身嘅質感同埋味道。麵嘅軟硬度相當適中，但略嫌湯底嘅蕃茄味唔夠濃；餸菜方面就係有肉燥，同埋半隻糖心蛋，肉燥都幾入味但份量方面再加多少少會更好，而糖心蛋嘅蛋味突出，唔錯。套餐小食嘅拍黃瓜，夠清爽，新鮮餐飲白桃綠茶我自己唔記得叫佢少甜少冰，好彩原來佢自己本身都唔會太甜白桃味幾香，但係可惜就飲唔到綠茶味。其實喺食物方面，整體我覺得都係合格之上，但係就略嫌食物定價高左少少，如果呢個餐賣$50嘅話，我會嚟多幾次。