Green Common (如心廣場二期) (已結業)

未來漢堡deluxe + 炸午餐肉入面有火箭菜蘑菇同埋黑松露醬。嗰嚿未來漢堡扒真係做得好似，鍾意食火箭菜同埋黑松露醬嘅呢一個係唔錯嘅選擇。跟餐加咗18蚊有半份炸新餐肉條，我數過都有六條嘅。如果未試過嘅可以試，但係我下次唔會再叫。芝脆焗豬扒飯個味都做得好好食，茄醬同芝士係平時茶餐廳嘅一樣，佢係採用咗日式嘅豬扒炸法。焗飯底係紅米飯所以感覺上會健康咗。All day breakfast 呢一個就有啲失望啦，All Day breakfast竟然冇蛋，我冇睇清楚嘅，見到一waffle就嗌咗。。但係佢嘅waffle竟然得一小塊。。。會唔會慳皮咗少少。。。呢度有兩嚿未來肉，一個係未來腸，一個係漢堡扒，我自己覺得呢兩樣嘢可以減少一樣，畀番個蛋我，會開心好多。佢嘅沙律菜都冇另外跟沙律醬，感覺有啲掛。黑椒汁肉絲炒麵呢個同平時食嘅冇乜分別，如果屋企有鍾意食中式嘅屋企人，又想帶佢去新餐廳嘅話可以試。涷杏仁奶 latte好大杯，都幾好飲嘅，但係飲唔慣嘅話，可能會覺得咖啡同杏仁奶唔係好match。