小王牛肉麵

營業中

休息中

週末黎荷里活廣場，經過好耐都無食嘅小王牛肉麵，就心思思想食台灣野。 記得好耐之前都有食過，不過嗰陣食肉燥飯，覺得麻麻地。所以今次就決定試下佢啲麵。食麵嘅話會有另一張分開嘅餐單。值得一讚嘅係好似食日本拉麵咁自己可以揀麵嘅軟硬度同埋其他配料(芫荽，蔥，酸菜)。麵條有得揀幼麵/粗麵，菜就有得揀高麗菜/小棠菜。我就揀左原汁牛肉麵，配粗麵同高麗菜。啲粗麵幾正，最中意食依種寬麵，掛住湯汁。個湯底一飲落就有藥膳嘅味，反而覺得如果個湯嘅牛肉味再重啲就好。牛肉有4-5塊，煮得好淋，而且唔會好似香港好多食台灣野嘅餐廳咁比牛展。 對我黎講依個麵味道ok, 食完都夠飽。個麵單點無包野飲係$55。雖然無野飲而且又要再加一，不過同其他台式餐廳嘅牛肉麵比又唔算係好貴。