開花結果 (榮吉工業大廈)

營業中

休息中

開花結果我食咗好多年，質素一直好穩定，通常都係食佢嘅包+沙律+飲品套餐，如果有時撞啱兩點半下午茶時間，就會叫雞髀沙律，佢嘅雞髀非常之好食，如果有全港炸脾排名榜，開花結果嘅炸雞髀可以入十大。講返套餐，最喜歡佢嘅黑椒蟹柳牛角包，係好奇妙嘅配搭，黑椒配蟹柳味道非常之夾，但牛角包始終係高脂肪食物，近年已改食麥包，沙律方面好多人都叫開花結果，但我喜歡佢嘅雜果沙律，如果啲蘋果可以切細粒啲更好。另外一款我自喜愛嘅沙律係薯仔西芹，又係另一個好奇妙嘅配搭，菠蘿粟米蛋以前都鍾意食，但而家唔知咩原因難食咗，嗰啲菠蘿有渣又冇味。飲品方面加錢有台式飲品，胚芽珍珠奶茶都唔錯。另外值得一提係戴眼鏡長髮嘅事頭婆好好人，好多年前試過銀包唔夠cash，呢間嘢又唔收電子支付，個收銀即刻燶曬面想報警咁，事頭婆即刻走過嚟叫我出去撳錢先，慢慢嚟唔使急，真係抵佢好生意。