李景粥品專家 (已結業)

今日師傅諗到頭爆都諗唔到食咩, 喺冇咩"艾啲牙"嘅情況底下, 唯有四處遊蕩, 最後行到呢間食店前, 師傅就停下腳步, 見到係食粥, 反正咁耐冇食過, 就入去試下啦!入到去店鋪非常之細, 得五至六張枱仔加兩個樓面, 坐底一睇, 嘩, 發覺食碗粥嘅價錢都唔平喎, 不過既然入左黎就豁出去, 話晒呢間都呢做粥品專家, 應該唔會差! 於是師傅就柯打簡單d嘅肉丸粥, 再加多一碟爽滑鮮魚皮!等一陣爽滑鮮魚皮即到, 師傅立即發覺魚皮上面有芝麻粒, 又唔係食腸粉, 都唔知點解會有芝麻, 感覺有少少不倫不類, 再試下個鮮魚皮, 發覺都幾鮮同埋冇腥味, 加上都算爽口, 但師傅覺得就始終唔及七喜正, 可以啦; 肉丸粥唔算好大碗, 但就有九至十粒豬肉丸, 先試下個粥底, 粥底唔綿加上非常淡口, 直頭好似白粥咁, 如果係因為冇落味精嘅話, 而令到個粥淡口, 咁呢間粥品專家都算失敗; 而肉丸就幾爽口, 唔會實的的, 不過內裡胡椒味頗重, 要扣分!總括黎講粥品嘅質素真係唔得, 就連最基本粥底要綿都做唔到, 咁學咩人賣粥呀? 環境擠逼, 服務普通, 價錢偏貴, 三兜野一碗肉丸粥, 廿八雞一碟爽滑鮮魚皮, 絕對唔算抵食;