村爺爺車仔麵 (已搬遷) 新店位置

由細到大都一直都好鍾意食車仔面，鍾意多款式，咩都可以自己揀，肚餓個時又可以叫多幾個款式。旺角粉麵店多於繁星，但唯獨呢一間我係會食完一次又一次。一間車仔麵真係好容易就食得出係好食定唔好食。一個麵加一D食材再加個湯底，就係咁簡單先蝦人做。呢個的食材俾人選擇都算多，但係個樣都係水準之作。車仔麵最正係可以自己揀辣汁同湯底，個日我就選左豬骨湯加沙嗲汁，沙嗲汁香濃中帶少少辣，撈落去個油麵度食真係好惹味。湯底帶有濃郁豬骨味，真係飲晒D湯都仲想再加湯。蘿蔔清甜多汁冇渣，用高湯燴得入味，知道原來為左好食，專登只係要蘿蔔個芯，即係最嫩滑個部份。南乳雞翼真係好少車仔麵店有得食，呢度你叫個時，D姐姐會幫你翻炸，保證入口熱辣辣脆卜卜。南乳味入晒D雞翼度，非常香口有水準。另外又叫左牛肋條，煮得軟滑多汁，一口一舊牛肋條真係好滿足。提得一提的係，車仔麵竟然可以食到和牛的味道，原因係原來每個麵底都會加上小店秘製的和牛牛油鹵水汁。再加上和牛牛油鹵水汁真係特別香滑。小店座位有限，想食到好野就要早D去拎返個好位啦。