蘇媽.蘇媽馬來西亞茶餐室 (已結業)

蘇媽蘇媽，幾年間分店愈開愈多，間間都係人龍店，一啲都唔簡單。之前多數同朋友去，好多時會叫肉骨茶，今次一條友，就簡簡單單，食個湯咖哩米通粉。我鍾意食米通粉，因為口感冇咁腍，而且粉中間空心，掛湯一流。一啖入口，頗辣而充滿椰香嘅咖哩湯底充斥味蕾，好正。配料都好豐富，有白魚蛋，魚肉卷，薯仔，芽菜，豆卜，豆角，薄荷葉等，特別鍾意索滿咖哩湯嘅豆卜，同埋煮得好腍好入味嘅薯仔。加五蚊叫埋杯鎮店之寶嘅拉茶，又香又甜，確實係食辣嘢嘅最佳配搭。