喵盒子 (已結業)

恢復晚市堂食嘅首晚，梗係要出去食番餐慶祝下🥳，今次揀咗屋企附近嘅 MeowBox，一間以貓為主題，但係成間店入面一隻真貓都唔見嘅 cafe😆。好耐冇食過 All Day Breakfast，所以今晚叫咗一客，入面嘅食材有炒蛋，香腸，雜菌，煙肉，多士同沙律，份量正常。當中最好食嘅係大肉腸，又香又 juicy，勁正👍；炒蛋都好嫰滑，入面仲有蛋汁，如果多番少少調味就更加理想；沙律係配秘製檸檬醬，本來對呢個醬有多少少期望，但係食完就覺得唔太特別。反而跟餐嘅 Americano 係一大亮點，咖啡既香且濃，非常有水準，後來先知道呢度嘅 barista 曾經攞過獎，認真失敬失敬🙇。為咗杯咖啡，我以後會再嚟幫襯。