王媽媽車仔麵 (已結業)

一直想食個車仔麵，星期日去開油麻地見到呢間王媽媽車仔麵，諗都無諗就衝左入去。車仔麵喎，梗係要包羅萬有啦。我叫左米粉底加四餸，唐生菜、咖哩魚蛋、魚腐、豬皮，怕清湯無味，要埋免費加腩汁。加左腩汁又如何，完全無牛味，淨係覺得成碗野好咸。啖啖米粉都覺得極咸。可能我偏向清淡，所以就唔係好啱我口味。最失敗係咩呀，就係魚蛋死實實唔彈牙，豬紅唔夠軟滑。不過好彩豬皮夠軟夠入味，魚腐大大粒有魚味而唔腥，唐生菜爽口，整體算補救番。米粉唔係超市買果種白色既，係半透明既新竹米粉，口感都唔錯，除左被搞到好咸之外。因為四餸會送凍/熱綠茶，可惜menu無寫，買完先見到牆上張A4紙寫住，所以半價優惠（即係加七蚊）叫左青檸薏米水，薏米都好軟熟，但陣青檸味原來都唔合我喜好，寧願佢加冰糖好過。優惠幾亂，牆上亂貼，似睇到就有，睇唔到就...😅唯一可取係地方寬敞，食飽坐多半個鐘休息下玩手機都無人趕。全餐盛惠$61，四餸車仔麵連飲品黎講算有D貴，其實加多幾蚊可以叫佢既大雜燴餐，但我雞仔肚驚食唔晒會浪費，咁地方舒服比我任坐就當交租。道理同去環境舒適既coffee shop飲咖啡一樣。