Puzzle Dining & Cafe (已結業)

馬鞍山雖然曾經被揶揄為美食沙漠，不過其實細心搵，都會發現正嘢。Puzzle Dining & Pizza 地方寬敞，落地玻璃面對大街，幾 cozy。下午茶時間嚟到，叫客王牌咸蛋黃單骨雞翼。雞翼一碟八隻，其實所有咸蛋黃食物只要咸蛋黃味夠，基本上已經冇得輸，呢個單骨雞翼嘅咸蛋黃味超級濃，入口鹹鹹香香，加上隻隻都炸得熱辣香脆，勁好食。建議要趁熱盡快食，因為一凍咗，咸蛋黃油凝固，絕對影響口感。對面位叫咗 Daily Cake Set 配 Syphon Coffee，蛋糕係朱古力榛子 mousse cake，我試咗少少，榛子味幾突出，口感綿密得嚟又唔會太甜，唔錯。我見杯虹吸好似幾得，於是又叫多杯。我揀咗哥倫比亞 Medellin 豆，感覺各方面都較為平衡，冇個別好突出嘅氣味或味道，唔算有個性，不過入口尚算順滑，絕對物有所值。