9 3/4 cafe (已結業)

今次終於黎到呢間之前好出名嘅哈利波特主題cafe。咁啱個日冇咩人，可能因為我地係下午茶時段黎，所以都可以周圍影下相打個卡。係門口都有哈利波特嘅設計。一入到黎都有好多擺設，成個感覺都幾好。然後枱面盞燈同埋個水杯都係哈利波特嘅野，好特別。咁我地就叫左2個小食，分別係卷卷蝦同埋芝士煙肉焗薯條。個蝦幾有特色，係出面都好少見，佢係酥炸薯仔包住蝦，好脆口，呢個配搭整得好好味，加埋個泰式辣醬更加好味。芝士煙肉焗薯條份量都多，味道就係正常發揮，不過可以再多d醬。主食我地就叫左3個，有西班牙軟爪陸蝦，即係番茄鮮蝦扁意粉，味道都OK；仲有軟殼蟹意粉，呢個覺得比較好味，都有原隻軟殼蟹；最後有港口匙，即係意式三文魚帶子意大利飯，呢個覺得係3個入面最好味嘅，全部食落都唔會太膩。但係如果幾個人share的話份量就略嫌比較細，每人只能夠試幾啖。最後飲品叫左幸運魔藥即係Mango Yogurt同埋Oreo朱古力，前者都比較藥水味同偏甜，後者就係少少沙冰咁都好飲。但飲品類覺得偏貴，唔太值。餐牌嘅食物名都好有心思，好有哈利波特風。