山頂餐廳酒吧 (已結業)

假期到中環行街，行到攰攰地，搵個地方歇歇腳，係中環自動扶梯側陡峭的斜坡有間Peak Café Bar，開放式木質庭院門，入到去覺得地方好寬敞，樓底又高，冇壓迫感，好relax，望住吧檯後面掛喺牆壁上嘅裝飾鏡畫，真係好似坐喺間民初大宅度。坐底即Order三杯飲品，Black Russian，Beer of the Month 同 Chi Chi ，當然唔少得加個下酒物，Chorizo Platter（西班牙風腸拼盤）啦﹗講到品酒，我係門外漢，其實邊隻啤酒對我嚟講都係冇分別；Black Russian飲落覺得苦中帶有甜甜嘅咖啡味，而Chi Chi就澀澀地，似乎Black Russian好飲尐，但酒精成份就高好多喇。Chorizo Platter好夠份量，有切肉風腸、烤香腸有薯茸墊底、配芥籽醬、仲有麵包、沙律同Pickles，薯茸很鬆軟，混有薯粒，油份少，似乎冇乜畀油撈過，較清淡同健康尐；切肉風腸辣辣地，略帶醎，配麵包就啱啱好；烤Chorizo帶有香料嘅獨特辛香，同薯茸一齊食真係好夾，加芥籽醬就會搶味，over咗喇，如果一個人食，真係好飽肚。