塔門仔海膽燒 (已搬遷) 新店位置

呢排周圍去，唯獨冇去塔門，因為去親塔門我呢啲新界人來回起碼來回5個鐘 lol 嘴饞既我又想回味下塔門風味既海膽炒飯，之前睇電視介紹佐敦開設塔門仔海膽燒，正正滿足我呢啲偏遠地區想食塔門海膽既人。個個都吹捧日本海膽既美味既時候，本地海膽其實都一啲唔輸蝕，塔門海膽亦充滿海水鮮味，炒飯粒粒分明唔濕軟，炒得唔錯，加上海膽鮮甜，為炒飯加唔少分。有別於塔門既係塔門仔海膽燒除左主打海膽炒飯之外，呢度有塔門既燒物食。人地飲茶一盅兩件，我就「一炒兩燒」。明太子雞翼相當脹卜卜，尤其雞翼被鹹香十足明太子塞滿，一咬之下明太子汁大爆發，雞翼皮燒得香脆，雞肉保持嫩滑。翠綠鮮嫩清爽既蘆筍被薄切脆卜卜豚肉包裹住，淡淡豚肉油香，非常搭配。當然唔少得要飲塔門手打奶茶同紫貝天葵，奶茶茶味濃郁，口感絲滑，紫貝天葵微酸帶甜，解渴之餘亦消除飽脹感。