616牛肉火鍋專門店 (已結業)

今日落大雨又咁啱想打邊爐，仲要手頭上有一張匙柄嘅贈券，於是就去咗好近紅磡地鐵站嘅616。每次去616都好窩心，因為店員都好有禮貌又細心咁去介紹牛肉唔同部位嘅特色。我同女朋友本身都唔鍾意食太肥嘅肉，每次店員都會好有耐性咁同我哋講解唔同部位嘅口感、肥瘦度、內味濃淡度等等，同我地上咗一堂牛肉課一樣。今次店員就介紹左肉味濃厚芳郁嘅橫膈肌、肥瘦適中嘅牛朴內同走肥嘅匙柄。我地仲點左彈牙牛丸，多汁雙併牛肉餃，同唔係好多地方有嘅羽衣甘藍。先講牛丸，比想像中有更濃郁嘅牛肉味而且十分彈牙真係好好味。雙餃子比較特別，其中有一款係麻辣餃子，裏面除咗有辣椒之外仲有一啲辣椒油混合湯汁係隻餃子入邊，食嗰陣時一定要小心啲唔係好容易辣親喉嚨，而且連一向嗜麻辣嘅我都覺得幾辣，如果鍾意食辣嘅你一定唔可以錯過！羽衣甘藍亦都好新鮮絕對可以一試。店員真係好好人，又俾咗牛頸脊嘅贈券我哋，睇嚟我哋好快又要去探下佢啦。