Mango Tree Kitchen (太古城中心) (已結業)

Mango tree 係我以前都幾常去嘅一間餐廳，今日去開太古城，喺情意結之下就入咗去光顧，點知都有少少失望😞。泰式炸蝦餅炸蝦餅一向都係我嘅至愛，因為覺得係屋企唔會點樣花心思去整，所以去親餐廳見到有都會食。但今日覺得呢個炸蝦餅一啲都唔好味，外皮勁厚粉，蝦餅冇乜蝦味，食完覺得有啲浪費quota😣！燒牛肉沙律🥗唔係好記得呢個沙律個菜名，但總之個主菜燒牛肉就唔好味，咬落好韌，肉好老，而且得嗰幾條牛肉，又冇乜菜，$108 完全唔值。泰式大蝦炒金邊粉全晚呢碟最似樣，味道開胃又香口，但留意番全碟只有兩隻蝦仔，唔知係唔係依家所有物價都貴咗，所以$118只係可以比到兩隻蝦。今晚食完飯最驚喜係送$100現金卷，下次可以用。但我極度懷疑可能因為啲嘢唔好食，所以要用呢個方法吸引啲客再翻返嚟🤪。但如果呢一餐可以即時減返$100，我覺得成餐飯嘅質素同價錢即刻合理返。