Chop Chop 食神叉燒 (新城市廣場) (已結業)

見有85折外賣自取，放工專登過黎買晚飯。見啲員工細心清潔又有禮貌，買外賣都放心好多。叉燒新鮮，見啲叉燒肉顏色比較淺白就知道首選要買嘅唔使講一定係「食神黯然銷魂飯」，當叉燒、煎蛋、豉油、飯，每樣都做得比人好嘅話，就唔係平凡一個叉蛋飯。半肥瘦口感實淨嘅叉燒，因為來回燒過幾次，嗰種焦香同平時食嘅叉燒係與眾不同。然後咬到肥肉嘅部份，完全唔覺得肥膩，係有少少爽口。半生熟煎初生蛋，仲有自己調校比較杰身嘅燒味豉油，五常米煮成軟硬適中嘅白飯，吸收左叉燒嘅焦香同燒味豉油，識食又食過嘅一定會體會到箇中嘅美味。切雞叉燒雙拼嘅叉燒同黯然銷魂飯嘅叉燒係完全唔同，少好多肥肉但好軟淋，焦香味冇咁重。切雞髀夠嫩滑，雞味好重。份量都OK。比較特別有木魚絲鋪面嘅食招牌乾炒牛河，炒得均勻惹味，牛肉新鮮冇渣，都唔錯。既然有八五折，就唔爭在叫埋鹹檸七、鹹檸樂。呢度用料唔差，用靚嘅鹹檸檬加冰，跟原罐汽水，返到去唔驚沖淡晒。外賣包裝企理，盒盒都裝滿嘅份量，外賣有呢個質素好唔錯！