籠太子點心專門店 (已結業)

上星期試左呢間話拍得住添好運點心嘅食肆，試後覺得非常一般，去過一次唔會有下次。 首先入到去環境狹窄， 唔夠冷氣，食到出汗。 不過啲嘢食嚟得頗快。雞扎$26, 好細隻 ，個魚肚又幼又薄， 第一次食啲咁嘅雞扎。 鳳爪個顏色一般，味道ok，但係辣到食唔到。 蝦餃超細粒，$14一粒，啲蝦又唔爽。 腐皮卷薄到冇人有， 每條得一粒蝦， 細到好似一毫子， 一開二，得一邊有蝦食。 牛肉拿粉味重，一啲都唔軟熟。 蝦膠釀茄子，賣相好靚， 上面粒蝦膠細不特止， 煎到又乾又硬， 仲話係推介，簡直中伏。 仲有一款叫「不是炸兩」， 係腸粉包住啲唔知咩炸嘢 ， 裏面夠炸嘢油林林又有啲苦。反而個燒賣幾好食。最後想講， 店內 24個座位坐滿，全程得一個侍應， 落單出菜執枱埋單，一腳踢。之後各枱都出左餐，差唔多食完，有一位貌似老闆嘅男人從廚房出嚟， 撳一撳個收銀機望望， 跟住又入返去喇， 真係鄧呢位侍應辛苦，而家d 老闆真刻薄。