麵軒 (已結業)

難得放假，同朋友一齊打算去譚仔食米線，但超多人，於是行行下轉去麵軒。４年前佢開張我地黎食過，食下午茶印象中已經係偏貴，而且好難食，４年後今日我地再黎試，我唸佢應該有Ｄ進步喇呱?我地叫左特價餐，但都差唔多＄４０一個，我覺得如果以佢呢個水準黎講係好貴好唔抵。香葉三杯雞竹筒飯：唔係竹筒，用普通碗載，我呆左= =薑同蒜分量好多，又大塊，雞好少，個汁非常甜，飯好淋，成碗飯都好差好差，真係好難食。食剩大半碗。頂級牛肉酥雞飯：牛肉係肥牛，個汁好怪，差！雞係炸雞，味道僅僅合格。都係食剩大半。飲品：（本身叫左芒果優酪同木瓜鮮奶，但落左單後２款野飲都無，於是改單）青蘋果蘆薈綠茶（加３蚊）：味道普通，可能係綠茶所以都叫做合格。鳳梨清香（加４蚊）：一個字，味道好怪。＂畢＂D鳳梨黎食先知原來係醃製既，可能我見識少，我真係未飲過咁騎呢既野飲，越飲越甜，最後都係飲唔哂。埋單兩人＄９０。找錢時我連貼士都唔俾，因為佢真係又貴又唔值，好唔開心食左餐咁既野。如果差分１０級，佢會有９級，如果唔係坐得舒服，佢拎第１０級係當之無愧。麵軒，真係無下次喇