鼎家喜筷 (已結業)

話說最近因為想食好既燒味中左好多伏，今次行完donki就同朋友入左鼎爺主理既鼎家喜筷試下有冇伏～相比起傳統既燒味店，鼎爺呢間就相對地年輕化好多，四圍都係佢既肖像插圖，而且除左燒味之外仲有日式沙律、台式飲品同甜品，都係幾意想不到既配搭。燒味又點可以冇叉燒，今次點左叉燒同埋燒鵝，可以揀切定唔切，因為想同朋友SHARE所以都叫師傅切左。叉燒要左半肥瘦，兩款睇落都幾肥美又有光澤～叉燒肉質好淋好嫩口，香蜜味；而個燒鵝本身都燒得唔錯，鵝皮好甘香脆口，有配一個柑橘醬，加埋黎食可以去左油膩感，個醬有少少似香橙朱古力既味。跟餐配日式芝麻醬沙律，細細份當食啲菜都唔錯。叫左杯烏龍芝士奶蓋，充滿台灣風味，芝味濃厚！我自己就比較喜歡水果茶，夠哂清甜，食完咁肥美既燒味飲返杯茶真係一流既享受～食完叉燒+燒鵝飯都唔夠喉，又叫左份饃餅雙拼，入面都係叉燒同燒鵝，同朋友交換口味黎試，味道同飯既燒味差唔多，不過夾多左塊青瓜同饃餅，口感唔錯。最後甜品揀左吐司我覺得算係烤得唔錯，比想像中好，因為出面好多烤吐司都成舊烤到磚頭咁、或者中間完全冇烤過，呢份都烤得幾平均，每格都香脆甜美；至於個雪糕就比較普通，我拎左花茶配既黑糖倒落去食，