倆口小吃 (已結業)

於2022年12月中才開業嘅美食廣場Basehall 2.0，裡面餐廳陣容真係不可忽視 - Ode▽ 鯛白湯らーめん、Mashi No Mashi、Porker、安利魚蛋粉麵等。講到最受食客歡迎嘅應該係喺2022年榮獲米芝蓮必比登推介嘅「倆口小吃」。對住喺港島嘅我簡直係一個喜訊，唔洗入元朗都可以食刈包同埋壓餅🤩我係喺星期六非繁忙時間去，壓餅已經售罄😔刈包都只係剩番兩款。▫️午市套餐 - 自選1款刈包、配炸番薯條(小)及罐裝汽水。自選刈包我揀咗「韓式泡菜炸雞」(單點價HKD68，套餐 +HKD28)。「倆口小吃」賣嘅刈包每日由人手搓製，應該係咁嘅原因而每日設有限定數量吧。餡料除了有一塊大炸雞之外仲有京蔥、翠肉瓜絲、梨。食刈包嘅時候有點難度😂因為實在太大件，好難一口將軟綿綿刈包同炸雞同時放入口。炸雞上嘅黃色醬汁係泡菜奶油芝士汁，又幾好味喎，同時令到炸雞有少少濕潤口感。▫️炸甜不辣 (HKD32) - 以一枝竹籤串起大約10件嘅炸甜不辣，上面淋上芝麻醬及灑上黑白芝麻。