生記茶餐廳 (已結業)

紅磡有蟹粥食，唔洗去澳門啦！有人帶路痴去搵食的確唔同，捐窿捐啦都唔洗怕盪失路，有人話呢間蟹粥好味喎，我又上網睇下食評啦，大致都係話好食嘅，去到見到店仔細細，極有懷舊大排檔格局，圓檯、膠櫈，冇咩裝修，老店一間。二人前食唔到大鍋，叫個細嘅夠哂兩人食啦，煲仔滾住上，熱辣辣，天氣凍走黎食暖下身都幾好，夏天就可以有點熱，因為冇咩冷氣㗎咋。地踎食蟹粥，2人份量隻蟹偏細，尚算多膏 & 新鮮呀！個粥底都煲好棉，輕輕食到有少少腐竹味，但我唔肯定有冇，係有味精嘅，食完會口喝嘅（笑）另外叫左蒜蓉蒸蜆，細細隻ok鮮的，因為係蒸嘅關係，每隻蜆粒肉都仲健在，唔會被炒到飛甩哂，咸咸的鹽水味，加上蒸蓉，係口臭之極品，不過幾隻有沙，呢個都幾難避免（笑）一不做，二不休，橫掂口臭就叫多個蒜蓉蒸蟶子，買5送1啊，umm...我又唔覺佢係好新鮮喎，亦唔係厚肉果種，不過價錢唔係貴就不得要求咁多啦！整體係ok嘅，又未去到神級咁好味，以咁嘅價錢算係唔錯啦！大家可以去試下啊！