泰.夯蝦 (諾士佛臺) (已結業)

好耐冇去過旅行啦，尤其係心愛嘅泰國，咁啱見到朋友社交平台之前提及尖沙咀呢一間專門食泰國流水蝦嘅放題料理，就算冇得去旅行，都可以頂下癮吖嘛。一入到去就見到有好多款嘅食物，除咗有專人處理海鮮之外，亦有 好多款嘅燒烤食物， 平均都有幾十款食物， 啱曬啲食肉獸，亦都有唔同嘅熟食同小食可以選擇。不過最吸引眼球嘅都係坐低埋位就見到個流水蝦缸， 慢慢食嘢，唔使行出去 食物區都可以夾到咁新鮮嘅流水蝦 ， 夠曬方便。第一時間我就出咗去拎海鮮，有大蜆元貝蚌仔等等嘅選擇，款款海鮮望落都好新鮮。不得不讚主角嘅流水蝦，每隻都好大隻，好鬼生猛， 而且蝦肉好甜好彈牙。不過記得燒之前，要擺佢落冰桶凍暈咗佢先好燒，如果唔係佢就會掙扎。元貝好鮮味，大大粒，少少調味料同蒜蓉已經夠好味。薄切雪花牛肉，牛味香濃，燒起油脂豐富，肥而不膩。另外仲有鮑魚送上，非常大隻新鮮， 仲會爆汁，真係好juicy。令我好驚喜嘅係， 呢度竟然有made in Hong Kong嘅雪糕波波，仲有好多款唔同嘅口味，例如榴槤、荔枝、桃、香芋等等，夠曬特別，味道香濃，口感軟滑， 忍唔住食多兩粒。