正宗上海生煎皇 (已結業)

夜晚嚟到深水埗，見到咁多唔同類型嘅餐廳，本身都諗唔到食乜，之後行過黃金對面見到一間食生煎包嘅餐廳，見好似都有幾多人排隊，所以就入咗去食。之後我哋就叫咗一籠生煎包，一籠小籠包，一碗擔擔麵，同埋一碗雞絲伴麵。首先嚟到嘅係生煎包，上碟嘅時候都仲係熱辣辣嘅，但層皮我略嫌硬左少少，但入面嘅湯非常之鮮味。小籠包呢就略嫌細隻咗啲啦，一啖就食晒，唔算非常之推介。反而擔擔麵同雞絲伴麵就有啲驚喜，湯底都唔錯，份量亦幾足料，埋單總共就係＄143 ，性價比都算唔錯嘅。