James Bonbon Bakery

營業中

休息中

睇咗其他食評，所以唔敢有太大期望。嗰日啱啱經過，本身好鍾意麻糬波波嘅我係好奇心驅使之下走咗去排隊。可能因為唔係好多人等嘅關係，店員態度正常。除咗基本口味，仲有當日新鮮出爐嘅唔同口味貼咗出嚟。我買咗紫薯、芝士粒粒、開心果柚子麻糬波波，加一個開心果布甸。包裝為成件事加咗唔少分，睇到唔同顏色嘅麻糬波波，摸落手仲係暖嘅，心情莫名好起黎。我一直拎到中環先至食，所以麻糬波波扁+塌咗係正常，意料中事。一打開個袋有好大陣香味，我即刻攞起顏色鮮艷嘅紫薯波波咬咗一啖，質地十分煙靭，唔太甜。口味呢樣嘢好個人，我比較鍾意淡口嘅，所以對於我嚟講味道OK。芝士粒粒口味正常，反而開心果柚子有驚喜，裏面有酸酸甜甜嘅柚子醬，好香同麻糬波波好夾。開心果布甸冇乜特別，但係上面鋪滿咗好多開心果果仁碎，布甸質地柔滑。如果我下次經過，應該會再幫襯。