南翔饅頭店 (已結業)

之前食過幾次, 覺得幾好味, 見朋友女未食過, 所以尋晚就同佢去食下。兩個人叫o左一客鮮肉小籠包, 一客蘿蔔絲穌餅同埋一客紹菜肉絲炒年糕。鮮肉小籠包既皮薄, 因為夾既時候又比出面既小籠包無咁易爛, 哩樣o野真係好考手勢, o的肉就食得出係有瑤柱o係裡面, 所以比坊間既鮮甜好多, 最抵讚既係佢地唔會用鎭江醋配小籠包, 因為如果點鎭江醋o黎食就完全食唔出小籠包裡面既鮮味！蘿蔔絲穌餅既皮就比較厚o左少少, 但係唔覺太漏, 裡面用o左好多蘿蔔, 不過我就覺得o的蘿蔔太長啦, 適宜再切短o的, 最好味係裡面有金華火腿令到o的蘿蔔味更加突出, 不過就覺得整得燶o左少少。紹菜肉絲炒年糕就較為普通, 不過味道都OK, 但係就多油o左少少, 同埋食得多係會好漏。整體既食物質素係唔錯, 不過o的服務就需要改善, 雖然唔可以叫做差, 不過個個都無乜笑容, 而且唔夠主動, 同新開張o個時真係差好遠, 希望佢地既service會好番o的啦！