美味佳 (已結業)

一直都好想試下美味佳！因為好多時晚上經過都見到室內爆到街上都要加檯！仲要有好多人排隊等位！又見到食評唔錯宜且價錢經濟！咁啱今晚成9點幾又經過美味佳，見冇乜人排隊，心諗今次有機會試到！行到埋去，同姐姐報人數！姐姐問坐街有冇所謂！咁當然ok啦！因為當晚天氣清涼，坐街仲唔使捱油煙味添！跟手姐姐問要等45分鐘先有得食！既然一場黎到就等下啦！睇下張點餐紙！都幾多選擇！而且真係好經濟！唔怪得咁多人食啦！見到咁，就呢樣又叫下嗰樣又試下！燒烤要等成45分鐘又見有D凍，先整碗車仔麵暖下胃先！慢慢d野食開始進場雞翼我個人覺得燒得好香同仲好Juicy. 另一樣我覺得都唔錯就係茄子，因為燒得時間夠，茄子已淋哂！基本上所有野都不過不失！唯一就係調味就比較劃一！可能大陸串燒既通病！都係辣粉加孜然粉！不過佢地有另一個調味問題，就係加左蜜糖！唔係咁夾！車仔麵就真係麻麻地！下次可以唔叫！好啦！到最尾先知道出事…因為真係點左好多野食！當然唔會浪費食物啦…食唔哂要打包走人埋單$350…因為實在叫左大多野！如果正常估計應該120-130都好夠！抵食就真係好抵！不過就自己衡量有冇耐性等咁耐…