養心麵 (已結業)

車仔麵大家就食得多，可以養生既車仔麵你又食過未呢？今次就同女朋友去咗養心麵嗰度，試吓佢哋出名嘅美人湯車仔麵。呢度嘅車仔麵有好多唔同配料，除咗港式車仔麵必備嘅配料之外，亦都有好多係台式特色材料，粉麵亦都有好多種選擇，除咗麵之外亦都有飯同各種台式小食。我今次就揀咗豬潤，台式炸豆皮，肉燥，美人湯配關廟麵。關廟麵好滑，豬膶大大塊好新鮮又唔腥。炸豆皮好大塊，好香豆味又唔會有油益味。女朋友就要左芝士腸，千層冰豆腐伴美人湯稻庭烏冬，另外再加多左一個辣汁魷魚鬚。先講芝士腸，平時去食車仔麵最多比四條，竟然呢度有六條，超抵食呀！冰豆腐索晒啲好清嘅湯，加埋美人湯超多份量嘅桃膠，完全唔覺得自己食緊車仔麵。稻庭烏冬亦都好滑，唔會淥得太淋。更加值得一讚嘅就係呢個辣汁魷魚鬚，好入味，辣得來之餘又唔會過分，好過癮！重點係連魷魚鬚都有桃膠呀！加咗咖喱辣汁嘅桃膠又另一種食法，好正！飲品方面，叫咗一支支裝可樂同埋熱嘅杞子菊花圓玉露，飲落好舒服好潤喉，又唔會太甜。估唔到食車仔麵都可以咁養生！