名館 (黃埔天地) (已結業)

兩個人想食啲小菜就嚟咗呢度，貪佢多款式，叫咗5個餸樣樣有啲以為差唔多，點知飽到反艇依家啲天氣成日都想飲啖湯，私房金黃球泡飯（HKD68）就啱晒，有少少飯焦口感唔錯。最正係湯清甜又多蔬菜。小菜就揀咗蜂蜜柚子蝦球（HKD78），蝦肉爽口又唔會有肥膏。特別嘅係柚子醬有青檸味中和返，冇咁甜添。和麻醬雞絲粉皮（HKD58）個醬有啲辣都唔錯，最鍾意佢有大大把花生碎，好足料。粉皮有啲似薯粉，幾掛汁添。蔬菜係必需食嘅，金銀蒜蒸勝瓜金菇（HKD58）有蒸扇貝咁嘅大堆蒜蓉提味，重口味得嚟又清清哋。黑金流沙包（HKD48）作為甜品嚟講好飽肚，但佢嘅流沙真係好出色，就算擺耐咗都一樣流得到㗎！唔怪得呢個係招牌甜品呀！埋單覺得貴咗少少，因為叫多咗，呢度夠3個人食囉。