辻利茶舗 (已結業)

聽聞黎自日本嘅「辻利茶舖」開咗喺 IFC，身為抹茶控嘅我，唔駛講肯定唔可以錯過啦。開張唔耐，離遠都可以見到人龍啦 >_< 好多款啊，心思思咁，唔知食邊款好𠻹。俾咗錢之後，店員會俾個飛碟你，等個飛碟震就可以去攞㗎啦。由於舖位較細，淨係得企位，所以要辛苦小小，企住黎食啦。 - Waffle Sundae Matcha（$78）見到係 IFC 限定，所以毫不猶豫揀咗哩款。雪糕揀咗抹茶味，雪糕唔會太甜同好軟滑，抹茶味勁濃同有回甘，雪糕上面撒上脆米，增加雪糕嘅口感；原味蛋糕卷軟綿綿得黎有蛋味；紅豆蓉雖然偏甜，但係夾埋有啲苦澀嘅抹茶味雪糕一齊食，啱啱可以中和翻；白玉大大粒，好煙韌好有咬口；食到最底底，唔好以為冇料到啊，其實勁多抹茶啫喱打底，不過我就覺得個啫喱口感怪怪地就唔食啦。最後再食埋個waffle，勁脆咯，好味。