玉葉甜品

營業中

休息中

食完晚飯唔夠飽，個friend話呢檔嘢好出名，成日有電視台嚟取景拍嘢，就帶我嚟食糖水。未行到埋個檔口，個friend已經俾老闆娘大聲喝住，話呢度唔食得煙，你食完先好行過嚟！頓時俾佢嘅威勢嚇窒咗，心諗唔洗咁惡吓嘛？坐喺斜路度，張櫈同個人係傾斜嘅，連放低個袋都驚跌，惟有孭住喺身。點知又比後面嗰台食客鬧話我個袋撞到佢，惟有再坐斜啲。到點餐時，要牛腩河冇河粉，咁改米粉冇米粉，成件事好麥兜⋯最後要咗牛腩麵$28、芝麻糊$13同糖不甩$13。牛腩麵嘅湯同牛腩都唔錯，係好瘦嘅腩。個芝麻糊食咗一啖真係食唔到落去，係粉開，完全唔係芝麻味。個糖不甩得椰絲冇花生，咬落成個粉團咁，真係唔啱口味⋯最慘係唔知點解幫襯仲要俾人鬧，其實你有你規矩可以好啲態度同人講，唔洗一嚟就媽媽聲。食到一肚氣，冇下次啦。