MangoChaCha (已結業)

同朋友慶祝生日，食完諾士佛臺入面一間西班牙菜，就想食埋糖水盡興一下。醒起之前有朋友話尖咀開咗一間新糖水舖，係食芒果甜品嘅！於是就拉隊去試下！去到好好彩，啱啱有兩枱客差唔多時間埋單，幾乎唔洗等位就可以有位坐。坐低睇完餐牌就叫咗個芒果雪花冰、黑糖挫冰同芒果窩夫，味道幾好，可能好少食台灣愛文芒，嗰種芒果味同食開嘅唔同，幾特別，佢嘅雪花冰比較軟身，所以食開爽嗰種嘅人可能會唔慣。黑糖挫冰味道唔錯，加埋啲海鹽更加帶出到味道。不過個窩夫有啲燶，同我睇上次朋友食嗰次嘅相有啲唔同，保持水準呢方面要扣返少少分。整體嚟講算唔錯，我會再嚟呢度試埋其他款式。