凱旋餐室

營業中

休息中

今日當完值就約老公去灣仔食飯，問佢食乜？唔駛諗，一見到間冰室就走入去，男人的浪漫….既然你問得佢，緊係順佢意，但估唔到間餐室令我喜出望外。環境光猛，簡約平實，乾淨企理。地方唔少，有多排闊寬嘅卡座，坐得舒適。選擇勁多，有晚餐精選、晚巿小菜、燒味、湯飯、粉麵、中/西式飯、輕食、二至四人套餐、飲味等。二人套餐配送油菜一碟、白飯、例湯或熱飲（$198）係我地最佳選擇。在A和B項各選一，我揀咗清蒸石斑，老公就揀川辣口水雞。例湯係眉豆節瓜豬骨湯（$0），落足料，煲得好夠火喉，熱辣辣。味道鮮香，唔會太鹹，完全無味精，好有家的味道，見老公喝得津津有味就知自己無做好老婆本份，無乜湯水給他….油菜（$0）仲可揀菜心或生菜，貼心！菜心翠綠粗壯，新鮮爽嫩，完全無渣，配些蠔油添鹹香。川辣口水雞 嘅醬料跟平時食唔同，唔止辣醬油咁簡單，好似仲有啲豆豉，可能係秘製的。估唔到份量咁足，仲有雞脾食，開心！黃油雞皮爽肉嫩，配埋醬料食，鹹辣惹味，但無辣到火辣，用來佐白飯一流，正！嘩！估唔到係餐室都食到清蒸原條石斑，仲有大大條，喜出望外。好厚肉，啖啖肉，蒸得剛好，嫩滑鮮美，好新鮮，我連頭尾都清埋，得！