喜多嬉牡蠣屋 (已搬遷) 新店位置

呢間牡蠣屋嚴選嚟自岡山縣、逾六十年歷史嘅北木島喜多嬉牡蠣養殖場嘅生蠔，品質有保證！喺90分鐘內大家可以狂食生、熟蠔、燒帆立貝、特色串燒、茶漬飯同埋湯/撈手延烏冬等美食，蠔控必須收藏！𖦹 食べ放題90分鐘 $498先出場嘅係前菜喜多嬉九品，賣相精美，有象拔蚌刺身、喜多嬉牡蠣茶漬飯、二色燒活白鰻、天婦羅秋葵、手工月見燒鳥串、天婦羅紫蘇葉吞拿魚蓉、時令沙律同日式漬物，其中以口感彈牙嘅手工月見燒鳥串最令人印象深刻，如果有得encore呢set就好了。跟住落嚟當然係主角生蠔。大隻嘅佢有我隻手掌咁大，食落肉質爽口鮮味，配上偏酸嘅士佐酢啫喱同微辣蘿蔔蓉，更顯蠔嘅甜味。我地食咗三四round，每隻都係新鮮、脹卜卜的！串燒方面試咗羊肉、墨魚仔、雞心、秋葵同蕃薯，可惜整體比較乾，烤過龍咗啲。好彩加埋醬料食，即刻加返分：有XO醬、蒜蓉醬、我超鐘意嘅孜然醬、以及香口唔太辣嘅秘製魔鬼辣椒粉。另推薦香脆嘅燒味淋魚乾，同埋勁滑嘅牡蠣秘製撈五島手延烏冬。飲品叫咗梨山烏龍、白桃烏龍兩款冷泡茶，解膩消濟。