新漢記飯店 (已搬遷) 新店位置

起初新漢記並非在暴食之列,但從群記步出,見爵士拉麵又無開舖,總不成食麻辣米線吧?反正都有一段時間無光顧,試試又無妨.尚未到中午飯時間,得小貓三幾隻,揭開餐牌睇睇,又有些新菜上場,聽聞是不時不食下的成果.炒魚麵:水準依然,不單夠鑊氣,加上西芹絲,香菜兜亂,魚麵彈牙,蘸點辣油,香口到不得了.黃酒煮雞:上次是放湯形式上檯,已經好討好,今次經阿姐提議,改為炒件上,果然有意想不到的效果,雞肉盡將黃酒吸收,令到肉質帶有甜味,而汁液亦收得洽到好處,不得了的一道客家菜.難怪阿火讚不絕口.走地雞:雖然肉質不如大肥雞嫩滑,反而肉味更集中,加上不帶半點肥油,肉味更濃洌.水瓜煮魚鰾:魚鰾一般是用沙爆,所以有時過水唔清會帶有小沙礫,聽聞此店用上沙頭角魚鰾,而且是用鹽爆,多了一份咸香.魚鰾吸收肉碎及水瓜所煮的肉湯,爽口清甜.白飯:白飯都寫?..........無錯,一碗平平無奇的白飯,加入店方提供的豬油和頭抽,咸香之餘,飯煮得粒粿分明,雖然同大榮華尚有段距離,但在粉嶺已別無分號.第三站已經要食上海野,睇下蒸餾水滿唔滿意先?